放假的星期一

嘿嘿～難得今日同班舊同事一齊放假，於是齊齊去左深井食燒鵝！燒鵝好味～但其他果Ｄ鵝肝鵝心鵝腸我完全唔夠膽掂，叫左碗米粉，就變左燒鵝米～ haha

and then 同兩位女士行街街。可能因為係星期一下晝行街的關係，突然感受到Ｄ阿太唔使做weekdays去shopping, high tea 既滋味～都................ 幾悶！雖然成日講話唔想做野，但其實唔係真係唔想做，只係想輕鬆Ｄ地做姐，同埋最好可以做自己想做既野！你話如果有塊地，我想將左邊建成托兒所，右邊建成老人院，可以好好照顧無依靠的老人家之餘，老人家悶悶地又可以去托兒所果邊同Ｄ小朋友玩下，幾好～ 不過講真，真係想開間老人院！我一定唔會欺負老人家，一定會代佢地既仔女或兒孫好好照顧佢地，等佢地可以開開心心過埋餘下的時間～

後尾一個人諗住去搭車返屋企時，係呢條彌敦道創興果邊綠色隧道附近，比一個高我一個頭的人擋住去路（居然高我一個頭，神奇！），話做問卷喎～行得街多的朋友通常都知呢Ｄ係sell野，所以唔好意思都好我不嬲都唔so佢地。話但佢幾狼呀，係完全唔比人過囉，我行左佢行左，我行右佢又行右喎，使唔使呀哥哥？擋兩擋佢既拍檔叫我幫下佢，話唔知會比人鬧定係乜，唉，算～五題問卷時間豪比你！點知佢又講埋Ｄ低能野，答完年年齡之後又話「Ｅ？唔似喎！」答完佢職業又話「Ｅ，咁勁？」佢個partner又搭爹：「咁你教幼、小、高邊樣？」真係滴哂汗囉！！！咁住問大約幾錢人工同埋用credit card還min 定 full pay，答完佢又話勁呀乜乜乜乜。我真係心諗：「大佬，又話快得五條問題，你講無謂野既時間仲耐過正題囉！」當然冇講出口。好不容易做完，佢又話拎埋資料就走得，咁我就梗係唔拎啦，佢又再次以佢的身軀阻擋我的去路，真係唔係講笑，不斷嘗試誇呢個障礙得都失敗，直情想調頭，後尾頂佢唔住是但啦拎份野即走，點知原來好似要去好遠！我就趁佢行入另一條路的空檔閃走左！太驚險了！好驚呀～搞到我miss左個車站都唔覺，發覺後又唔敢行返轉頭，寧願行多個站！！嗚嗚，嚇死人了！

佢地唔係咩美容院的sales，竟然係一間正正經經的銀行－Fortis!!! 我哥哥佢岩岩離開左既公司！哥～你走得好！